धनगढी– धनगढी प्रिमियर लिग (डीपीएल) को तेस्रो संस्करणको फाइनल खेलमा शनिबार (आज) हुँदैछ । उपाधिका लागि महेन्द्रनगर युनाइटेड र सिवाईसी अत्तरिया भिड्दैछन् ।

धनगढीको फाप्ला क्रिकेट मैदानमा खेल १२: ३० मा शुरु हुनेछ । नेपाली राष्ट्रिय क्रिकेट टोलीका दुई स्टार खेलाडीले नेतृत्व गरेका टोली महेन्द्रनगर युनाइटेड र सिवाईसी अत्तरियाबीचको खेलमा दुवै खेलाडीको परीक्षाका रुपमा पनि हेरिएको छ ।

महेन्द्रनगरको कप्तानी राष्ट्रिय टोलीका भरपर्दा ब्याट्सम्यान शरद भेषावकरले गरिरहेका छन् भने अत्तरियाको नेतृत्व युवा स्टार दीपेन्द्रसिंह ऐरीले गरिरहेका छन् ।

खेल अघि शुक्रबार भएको पोष्ट म्याच कन्फ्रेरेन्समा दुवै कप्तानले आ—आफूले उपाधि उचाल्ने ‘दाबी’ गरेका थिए । सर्वाधिक पुरस्कार राशिको धनगढी प्रिमियर लिगको विजेताले ३० लाख प्राप्त गर्नेछ भने उपविजेता टोलीले १२ लाख प्राप्त गर्नेछ ।

डीपीएलको पहिलो र दोस्रो संस्करणको विजेता टोली धनगढी टिम चौराहका कप्तान सोमपाल कामीले नेतृत्व गरेको नयाँ घरेलु टोली धनगढी स्टार्स यो सिजनको लिग चरणबाटै बाहिरिएको थियो ।