काठमाडौं– पत्रकार शालिकराम पुडासैनी प्रकरणमा अनुसन्धानका लागि हिरासतमा रहेका रवि लामिछानेको समर्थनमा नायिका निता ढुंगानाले चितवनमा आन्दोलन चर्काउन जाने बताएकी छिन् ।

उनले रविको समर्थमा उित्रएको भीडलाई लिएर रविको समर्थनलाई नभएर रविको कामलाई समर्थन गरेको जनाएकी छिन् ।  उनले जालझेलमा निर्दोष व्यक्तिलाई फसाइयो भन्ने ‘प्रुफ’ वा केही संकेत मात्र मिल्यो भने भोलि म चितवन नै गएर जुलुस उठाउँछु ।

हिरासतमा रहेका रवीको अविलम्ब रिहाईको माग राख्दै उनले प्रहरीविरुद्ध आक्रोश पोखेकी छिन् । रविका विषमा कलाकारहरु पनि दुई कित्तामा बाडिएका छन् ।

कसैले रवीको समर्थन गरेका छन् भने कसैले रविको विरोध नगरी शालिकरामले न्याय पाउनुपर्ने माग राखेका छन् । शुक्रबार नै नायक पुष्पल खड्का र नायिका साम्राज्ञी राज्यलक्ष्मी शाह रवि लामिछानेलाई भेट्न चितवन पुगेका थिए ।

उनीहरुले सत्यको सधैँ जित हुने भन्दै रविले न्याय पाउने विश्वास व्यक्त गरे । त्यस्तै नायक पुष्पल खड्काले रवि लामिछाने, धुर्मुस सन्तली जनताको राजा भएको बताएका थिए।

‘रवि लामिछाने, धुर्मुस सन्तली जनताको राजा हुन्’ खड्काले भने, ‘उहाँहरुले सरकार र राजनीतिज्ञले गर्न नसकेको धेरै काम गर्नुभएको छ ।’

घटनालाई लिएर एकथरीले रविलाई व्यक्तिगत रिसिईबी साँध्नको लागि फसाउने प्रपञ्च रचिएको र सोहीअनुसार षड्यन्त्र गरिएको भन्दै चर्को नारावाजी गरिरहेका छन् भने अर्कोथरिले रवि समर्थक भीडतन्त्रले छानबिन र घटनाको अनुसन्धानमा बाधा पुगेको भन्दै गम्भिर ध्यानाकार्षण गराएका छन् ।