काठमाडौं– प्रहरी महानिरीक्षक सर्वेन्द्र खनालले खेलकुद विकासको संवाहक भएकाले खेलकुदको स्तर वृद्धिका लागि सबैको सहकार्य र समन्वय आवश्यक रहेको बताएका छन् ।

राष्ट्रिय प्रहरी प्रशिक्षण प्रतिष्ठान महाराजगंजमा आइतबार आयोजित समारोमा खेलकुद प्रशिक्षक प्रशिक्षण कार्यक्रमको उद्घाटन गर्दै महानिरीक्षक खनालले नेपाल प्रहरीका खेलाडीले उच्चस्तरको खेल प्रदर्शन गर्दै आएको बताए ।

खेलाडीहरुले राष्ट्रको गर्व, इज्जत र प्रतिष्ठा बढाउन उच्च नैतिकता र अनुशासनका साथ आफ्नो कौशल प्रदर्शन गर्न आवश्यक रहेको बताए । प्रहरी महानिरीक्षक खनालले समुदाय(प्रहरी साझेदारी कार्यक्रममार्फत विभिन्न खेलकुदका विधाहरुलाई स्थानीय क्लबहरुसँग समन्वय गरेर नेपाल प्रहरी अगाडि बढ्ने बताए ।

नेपाल प्रहरीले अहिलेसम्म खेलकुदमा गरेका उपलब्धीहरुलाई जगेर्ना गरी अझ राम्रो खेल प्रदर्शन गर्दै अगाडि बढ्न खेलाडीहरूलाई निर्देशन दिए । उक्त अवसरमा राष्ट्रिय प्रहरी प्रशिक्षण प्रतिष्ठान महाराजगंजका कार्यकारी निर्देशक प्रहरी अतिरिक्त महानिरीक्षक पुष्कर कार्कीले स्वागत मन्तव्य व्यक्त गरेका थिए ।

समारोहमा एन्फाका अध्यक्ष कर्मा छिरिङ शर्पा र काठमाडौं महानगरपालिका वडा नम्बर ३ का वडा अध्यक्ष दीपक केसीले नेपाली खेलकुद क्षेत्रले नेपालको पहिचान अन्तर्राष्ट्रिय स्तरमा पुर्‍याउने भएकाले खेलकुद क्षेत्रको विकास अपरिहार्य रहेको बताए ।

कार्यक्रममा प्रहरी अतिरिक्त महानिरीक्षकहरु, प्रहरी नायव महानिरीक्षकहरु, नेपाली सेना खेलकुद प्रमुख महासेनानी शशिकिरण रायमाझी, प्रहरी वरिष्ठ अधिकृतहरु, विभिन्न संघ सस्थाका प्रतिनिधिहरु, नेपाल प्रहरीका खेलाडीहरु र प्रहरी कर्मचारीहरुको उपस्थिति रहेको थियो ।