सर्लाही– जिल्लाको लालबन्दी नगरपालिका–५ मेजरगञ्जबाट प्रहरीले एक थान कटुवा पेस्तोलसहित दुई जनालाई नियन्त्रणमा लिएको छ ।

मेजरगञ्जको भित्री सडकमा इलाका प्रहरी कार्यालय लालबन्दी, सर्लाहीबाट खटिएको गस्ति प्रहरीको टोलीले कटुवा पेस्तोलसहित जब्दीबाट लालबन्दीतर्फ आउँदै गरेको ना ६ प २३९२ र बीआर–०६–एजे–०८०६ नम्बरको मोटरसाइकल नियन्त्रणमा लिएको हो ।

मेजरगञ्ज–५ का ४० वर्षीय सोनालाल ठाकुर र ३० वर्षीय राजेश महतो पक्राउ परेका हुन् ।

प्रहरीको गस्ती टोलीलाई देख्ने बित्तिकै राजेश महतो भने मोटरसाइकल छाडेर भागेका थिए । भाग्ने क्रममा महतोले कम्मरमा बाँधेको बर्षादीसँगै झरेको पेस्तोल प्रहरीले बरामद गरेको थियो ।

ठाकुर भने सोही स्थानबाट पक्राउ परेको प्रहरीले जनाएको छ । फरार महतोलाई प्रहरीले लालबन्दी नगरपालिका–७ बाट नियन्त्रणमा लिएको थियो ।