काठमाडौं – चलचित्र ‘रातो टीका निधारमा’ का निर्देशक अशोक शर्माले अर्को वर्ष पनि दशैँको अवसर पारेर चलचित्र रिलिज गर्ने बताएका छन् । गतवर्ष चलचित्र ‘जय भोले’ दशैँमा रिलिज गरेका शर्माले यस वर्षको दशैँ पारेर चलचित्र ‘रातो टीका निधारमा’ रिलिज गर्दैछन् ।

खबरहबसँगको कुराकानीमा शर्माले अर्को वर्ष पनि दशैँको अवसर पारेर चलचित्र प्रदर्शन गर्ने बताए । ‘हामीले गत वर्षजस्तो पहिले नै फिल्मको प्रोजेक्ट घोषणा त गरेका छैनौँ, तर अर्को वर्ष पनि दशैँ पारेर नै फिल्म रिलिज गर्छौँ,’ शर्माले भने ।

असोज १० गतेदेखि प्रदर्शनमा आउन लागेको चलचित्र ‘रातो टीका निधारमा’ गत वर्ष नै निर्माणको घोषणा गरिएको थियो । यो चलचित्रमा अंकित शर्मा र साम्राज्ञी राज्यलक्ष्मी शाहको शीर्ष भूमिका रहेको छ । दशैँको महत्त्व झल्काउने यो फिल्मले रिलिजअघि राम्रै चर्चा कमाएको छ ।