काठमाडौं–कानून न्याय तथा संसदीय मामिला मन्त्री भानुभक्त ढकालले आफ्नो गाउँको विकासमा सबै जुट्नुपर्ने बताएका छन् ।

तेह्रथुम सरोकार समाजले शनिबार काठमाडौंमा आयोजना गरेको सातौ वार्षिक साधारणसभा तथा स्मारिकाको लोकार्पण कार्यक्रममा बोल्दै विभिन्न कामले राजधानी आएकाले आफ्नो गाउँ र समाजको विकासका लागि सोच्ने बेला आएको बताए ।

संविधानसभाबाट संविधान जारी भएपछि अहिले देशमा कानून निर्माणको काम करिब करिब सकिएको भन्दै अब बाँकी काम देशको विकास र समृद्धिका लागि हुनुपर्ने बताए ।

आफूले सम्हालेको कानून, न्याय तथा संसदीय मामिल मन्त्रालयले गरेको कामको बारेमा जानकारी दिँदै सरकारले छोटो समयमा धेरै काम गरेको दाबी गरे ।

नेपालको कानूनी इतिहासमा यति छोटो समयमा यति धेरै कानून बनेको पहिलो भएको बताए । नेपालमा कानून निर्माणको काम विश्वमै पनि धेरै भएको हुनसक्ने मन्त्री ढकालले बताए ।

मुलुकमा भएका सबै राजनीतिक दल मिलेर छोटो अवधिमा २ सय ४२ कानून निर्माण गरिएको भन्दै मन्त्री ढकालले प्रायः सबै कानून सहमतिमै बनेको बताए ।

३/४ वटा कानूनमा मात्र केहि अल्झन भएपनि त्यसमा पनि सहमति खोजिएको उनले बताए ।

अहिले सरकार देश निर्माणको अभियानमा लागेको भन्दै मन्त्री ढकालले सरकारको यो अभियानलाई साथ दिन आम सर्वसाधारणलाई पनि आग्रह गरे ।

‘तेह्रथुम सरोकार समाजले पनि आफ्नो जिल्लाको विकासका र जिल्लाको श्रीवृद्धिका लागि सबैलाई एक ठाउँमा भेला पारेर काम गरेको छ । यो सारहनीय हो,’ उनले भने, ‘अब आफ्नो गाउँमा विकास निर्माणमा सबै जुट्ने बेला भएको छ ।’

प्रतिनिधिसभाका सांसद भवानीप्रसाद खापुङले देश संविधान कार्यान्वयनको चरणमा रहेको भन्दै संविधान अनुसार नै विकासका कामले गति लिने बताए ।

समाजका प्रमुख सल्लाहकार विजय सम्बाहाम्फेले जिल्लाका समस्यालाई हल गर्न सबै एक हुनुपर्ने बताए ।

सरोकार समाजका अध्यक्ष मोहन कुमार डाँगीले तेह्रथुमबासीका लागि यो साझा चौतारी भएको भन्दै यो चौतारीले आफ्नो जिल्लाको विकासका लागि काम गर्नुपर्ने बताए ।