नैरोबी– अफ्रिकी मुलुक केन्यामा भ्रष्टाचारको आरोपमा अर्थमन्त्री हेनरी रोटिचलाई पक्राउ गरिएको छ । दुई बाँध निर्माणका क्रममा ठूलो अनियमितता तथा भ्रष्टाचार गरेको आरोपमा उनलाई सोमबार पक्राउ गरिएको अन्तर्राष्ट्रिय सञ्चारमाध्यमले जनाएका छन् ।

उनीविरुद्ध इटालियन कम्पनी सीएमसी डि राभेनाले निर्माण गर्न लागेका दुई बाँध निर्माणका क्रममा रोटिच र उक्त कम्पनीले ठूलो अनियमितता गरेको अभियोग लागेको छ । उनी तथा उक्त कम्पनीका निर्देशक इटालियन नागरिक पाओलो पोर्सेलीसहित सहित २७ जनाविरुद्ध सोमबार नै विभिन्न ८ अभियोग दर्ता गरिएको छ ।

उनीहरुविरुद्ध अभियोग दर्ता गरेलगत्तै उनलाई पक्राउ गरिएको हो । उनले भने आफूले कुनै गलत काम नगरेको बताउँदै आएका छन् ।
पश्चिम केन्यामा निर्माण गरिएको बाँधका लागि ४४ करोड ६० लाख अमेरिकी डलर खर्च भएपनि सरकारी कोषबाट भने ६० करोड डलर निकासा भएको थियो ।

पक्राउ गरिएका मन्त्रीको स्थानमा अब को अर्थमन्त्री बन्छ भन्ने अझ स्पष्ट नभइसकेको बताइएको छ । केन्यामा चरम भ्रष्टाचार हुने गरेको बताइन्छ । भ्रष्टाचारमा संलग्न अधिकांशमाथि अभियोग लागेपनि थोरैमात्र दोषी प्रमाणित भई कारवाही हुने गरेको छ ।