नेपालगञ्ज– प्रदेश पाँचमा जारी आठौँ राष्ट्रिय खेलकुद प्रतियोगितामा विभागीय टिम त्रिभुवन आर्मी क्लबले सर्वाधिक पदक जितेको छ ।
आर्मीले हालसम्म १८५ स्वर्ण मध्ये ७५ स्वर्ण, ४६ रजत र ३९ कास्य पदकसहित कूल १६० पदक हात पारेको छ ।

यस्तै सशस्त्र प्रहरीको एपीएफ क्लव दोस्रो स्थानमा उक्लेको छ । उसले ३१ स्वर्ण, ३१ रजत र ३६ कास्य गरी कूल ९८ पदक जितेको छ । नेपाल पुलिस क्लबले हालसम्म ३२ स्वर्ण, २९ रजत र ३१ कास्य पदकसहित कूल ९२ पदक जित्दै एपीएफ भन्दा पछाडि परेको छ ।

चौथो स्थानमा रहेको प्रदेश ३ ले १३ स्वर्ण, २० रजत र ४० कास्य पदक गरी ७३ पदक हात पारेको छ । पाँचौ स्थानमा आफ्नो नाम दर्ज गराएको सुदूरपश्चिम प्रदेशले ७ स्वर्ण, ५ रजत र १८ कास्यसहित ३० पदक जित्दा गण्डकी प्रदेशले ६ स्वर्ण ११ रजत, २७ कास्य गरि ४४ पदक जित्न सफल भएको छ ।

हालसम्म टेबलटेनिस, ट्रायथलन, कुस्ती, फेन्सिङ, साइक्लिङ, स्क्वास, जुडो, कबड्डी, फुल कन्ट्याक्ट कराते, बास्केटबल, गोल्फ, बुद्धिचाल, लन टेनिस, हक्की, शारीरिक सुगठन, ब्याडमिन्टन, आर्चरी लगायतका खेलहरु सम्पन्न भईसकेका छन ।