काठमाडौं– राष्ट्रिय सभाका सांसद रामनारायण विडारीले दोहोरो शिक्षा प्रणालीको मार नेपालले भोग्दै आएको भन्दै त्यसलाई हटाउन माग गरेका छन् ।

पहिला नारी शिक्षा मातृ शिक्षा हुनुपर्ने , छोरा छोरी नपढाउने मुर्दावादका नारा लगाइएको भन्दै उनले फेरि नारा लगाउनु पर्ने अवस्था बनेको हो भन्दै प्रश्न गरेका छन् ।

‘गरीब र धनीलाई छुट्याएर पढाउने मुर्दावाद भन्नुपर्ने बेला आएको हो ?’ प्रश्न गर्दै सांसद विडारीले भने,‘गरीब र धनीका छोरीलाई समानरुपमा पढ्ने व्यवस्था राज्यको नीतिमा हुनुपर्ने हो, छ पनि तर भएन ।’

मेडिकल कलेजमा पढ्न भनेर भर्ना हुन गएका विद्यार्थीसँग मेडिकल कलेजले अवैध शुल्क लिएको र ५१ दिनसम्म पढाइ अस्तव्यस्त पार्नेहरुलाई कानून अनुसार कारवाही गर्न उनले माग गरे ।

‘५१ दिन सम्म पढाइ अस्तव्यस्त भयो । यो एक प्रकारको कानून विपरितको काम थियो’ सांसद विडारीले भने‘कानूनी भाषामा यो एक प्रकारको ठगीको काम हो, उनीहरुलाई सजाय गर्नु पर्दैन ? अब पैसा दिने भनेर पुग्छ ?’