एजेन्सी– बंगलादेशको राजधानी ढाकामा भएको आगलागीमा परी ज्यान गुमाउनेको संख्या ७० पुगेको छ ।

ढाकाको पुरानो शहरमा रहेको रासायनिक भण्डारण केन्द्रमा आगलागी भएको द डेली स्टारले जनाएको छ। ठूलो आगलागी भएका कारण ज्यान गुमाउनेको संख्या बढ्ने अनुमान गरिएको छ ।

५ तले रासायनिक भण्डारको पहिलो तलाबाट हिजो (बुधबार) राति १०:४० मा शुरु भएको आगलागी नजिकका अन्य ३ घरहरुमा समेत फैलिएको थियो। आगलागी नियन्त्रणका लागि ३७ वटा दमकल प्रयोग गरिएको थियो ।

रसायनिक भण्डारण भएको र ठूलो भवनमा लागेको आगो नियन्त्रणमा लिन दमकललाई निक्कै समय लागेको थियो । दमकलले बिहान ३ बजेतिरमात्र आगो नियन्त्रणमा लिन सकेको थियो ।

आगलागीमा परेका ४१ जनाको जीवितै उद्धार गरिएको छ । उनीहरुको ढाका मेडिकल कलेजमा उपचार भइरहेको छ ।