काठमाडौं– पर्वतको कुटुवाचौपारी खानेपानी आयोजनामा ५ लाख २० हजार ९ सय ८१ रुपैयाँ बराबरको भ्रष्टाचार भएको खुलेको छ ।

खानेपानी तथा सरसफाइ डिभिजन कार्यालय पर्वतका तत्कालीन इन्जिनियर प्रेम बहादुर थापा समेत ५ जनाको मिलेमतोमा खानेपानी आयोजनामा अनियमितता भएको खुलेको हो ।

अख्तियार दुरुपयोग अनुसन्धान आयोगले गरेको छानबिनबाट आयोजनाको वास्तविक कामभन्दा बढी काम भएको देखाएर बढी भुक्तानी लिइ भ्रष्टाचार गरिएको देखिएको छ ।

कटुवाचौरी गुणस्तरीय खानेपानी तथा सरसफाइ योजनाको प्रशोधनशाला अन्तर्गत ‘स्लो स्याण्ड फिल्टर’ समेतको निर्माण कार्य ३१ असार २०७० मा सम्पन्न भएको भनेर उपभोक्ता समितिलाई हस्तान्तरण गरिएको थियो ।

तर, उक्त कार्य मापदण्डअनुसार नभएको भन्दै अख्तियारमा उजुरी परेको थियो । उजुरीमाथि छानबिन गर्ने क्रममा निर्माण कार्यमा बास्तविक काम भएको भन्दा बढीको झुटो बिल भर्पाइ बनाएर भ्रष्टाचार भएको अख्तियारले जनाएको छ ।

अख्तियारका अनुसार उक्त आयोजनाको निर्माणसम्बन्धी झुटा बिल भर्पाइ बनाएर खानेपानी तथा सरसफाइ कार्यालयका तत्कालीन प्रमुख ईन्जिनियर प्रेम बहादुर थापा तथा सिनियर डिभिजनल ईन्जिनियर अमोध धितालसहित उपभोक्ता समितिका पदाधिकारी समेतको मिलेमतोमा ५ लाख २० हजार ९ सय ८१ रुपैयाँ बराबरको भ्रष्टाचार भएको हो ।

अख्तियारले खानेपानी तथा सरसफाइ कार्यालयका तत्कालीन प्रमुख ईन्जिनियर प्रेम बहादुर थापा तथा सिनियर डिभिजनल ईन्जिनियर अमोध धितालविरुद्ध मा ५ लाख २० हजार ९ सय ८१ रुपैयाँ बिगो तथा जरिवाना र कैद सजाय माग दाबी गर्दै मंगलबार विशेष अदालतमा भ्रष्टाचार मुद्दा दायर गरेको छ ।

अख्तियारले उपभोक्ता समितिका अध्यक्ष नारायण शर्मा लामिछाने, सचिव सुरेश बहादुर पीसी र कोषाध्यक्ष दिवाकर शर्मा लामिछानेविरुद्ध पनि मा ५ लाख २० हजार ९ सय ८१ रुपैयाँ बिगो तथा जरिवाना र कैद सजाय माग दाबी गर्दै अदालतमा मुद्दा दायर गरेको छ ।