वेलिङ्टन– न्यूजिल्याण्डको क्रिष्टचर्च शहरमा ५० जनाको ज्यान जानेगरी दुई मस्जिदमा भएको गोलीकाण्डमा प्रयोग भएका अर्धस्वचालित बन्दुकमा न्यूजिल्याण्डभर प्रतिबन्ध लगाइने भएको छ ।

न्यूजिल्याण्डकी प्रधानमन्त्री जसिण्डा अर्डेनले पत्रकार सम्मेलन गर्दै न्यूजिल्याण्डको बन्दुक राख्न पाउने कानूनमा संशोधन गर्दै त्यसलाई अझ कठोर पारिने बताएकी हुन् ।

उनले सैनिकस्तरका अर्धस्वचालित तथा असल्ट बन्दुकबाट न्यूजिल्याण्डका जनताको सुरक्षामा गम्भीर खतरा उत्पन्न भएको भन्दै अर्धस्वचालित तथा असल्ट बन्दुकमाथि प्रतिबन्ध गर्ने गरी कानून संशोधन हुन लागेको जनाएकी हुन् ।

नयाँ कानून आगामी अप्रिल ११ बाट लागू गरिने तथा नयाँ कानूनमार्फत् प्रतिबन्ध लगाइएका, तर यसअघि बेचिएका बन्दुक फिर्ता गर्नसक्ने व्यवस्था समेत लागू गरिने प्रधानमन्त्री अर्डेनको भनाइ छ । त्यसका लागि २० करोड न्यूजिल्याण्ड डलर खर्च हुने प्रधानमन्त्रीको भनाइ छ ।

यद्यपि, नयाँ कानून अनुसार किसानहरुलाई जङ्गली जनावरबाट आफ्ना गाइवस्तु र भेडाबाख्राको रक्षा गर्नका लागि बन्दुक राख्न कुनै असुविधा नहुने बताइएको छ । नयाँ कानूनलाई न्यूजिल्याण्डको किसान युनियनले पनि समर्थन गर्ने जनाएको छ । त्यसबाहेक त्यहाँको विपक्षी पार्टीहरुले पनि बन्दुकसम्बन्धी कठोर कानूनलाई समर्थन गर्ने जनाएका छन् ।

न्यूजिल्याण्डमा हाल अभ्यासमा रहेको बन्दुक कानून अनुसार मानिसहरुले निश्चित प्रक्रिया पूरा गरेपछि ७ राउण्ड गोली हान्न सक्ने अर्धस्वचालित बन्दुक खरिद गर्ने अनुमति पाउँछन् । तर, गत साताको शुक्रबार मस्जिदमा गराइएको आक्रमणमा बन्दुकधारीले बन्दुक र त्यसमा लाग्ने म्याग्जिनलाई परिष्कृत गरी बन्दुकलाई अझ घातक बनाएका थिए ।

५० लाख जनसङ्ख्या रहेको न्यूजिल्याण्डमा मानिसहरुसँग हाल १५ लाख बन्दुक रहेको बताइन्छ । त्यसमध्ये १३ हजार ५ सय बन्दुक अर्धस्वचालित सैनिक स्तरका छन् ।