काठमाडौ‍ं – नेपालमा ‘वर्ल्ड मिस युनिभर्सिटी नेपाल २०१९’ आयोजना हुने भएको छ । डायमण्ड स्टार फिल्म इन्टर्टेन्मेन्ट र भिसापार्क एजुकेसन कन्सल्टेन्सीको आयोजनामा प्रतियोगिता हुन लागेको हो ।

विजेताले वर्षको अन्तमा आयोजना गरिने ‘वर्ल्ड मिस युनिभर्सिटी’मा नेपालको प्रतिनिधित्व गर्दै विभिन्न ६० देशका प्रतिस्पर्धीसँग प्रतिस्पर्धा गर्न पाउने आयोजकले जनाएको छ ।

प्रतियोगिताको मुख्य उद्देश्य विश्वमा शान्ति र भातृत्व कायम गर्नु र प्रेम बाँड्नु रहेको आयोजकले जनाएको छ ।

प्रतियोगितामा वर्ल्ड मिस विश्वविद्यालय नेपाल २०१९ विजेता, वर्ल्ड मिस युनिभर्सिटी नेपाल २०१९ फर्स्ट रनर अप, वर्ल्ड मिस युनिभर्सिटी नेपाल २०१९- सेकेन्ड रनर अप गरी तीन मुख्य टाइटल रहेको जनाइएको छ ।

प्रतियोगितामा निर्णायकका रूपमा विश्वविद्यालय प्रतिनिधि, ब्यूटीशियन, ड्रेस डिजाइनर,व्यावसायिक मोडल लगायत रहने जनाइएको छ ।

संयुक्त राष्ट्र सङ्घले स्थापित विश्व शान्ति वर्षको उपलक्ष्यमा बुद्धिमत्ता, उच्च नैतिक प्रतिष्ठा, र शारीरिक सौन्दर्य र शक्तिसँग उत्कृष्ट महिला स्नातक छनौट गर्न विश्वविद्यालयमा अध्ययन गरिरहेका छात्राहरूलाई अवसर प्रदान गर्दै यो प्रतियोगिता आयोजना गर्ने भएको हो ।

सन् २००३ मा नेपालको प्रतिनिधित्व गरेकी आयुषा श्रेष्ठले प्रतियोगिताको टाइटल जितेकी थिइन् ।