नयाँ दिल्ली– भारतले अर्थतन्त्रको गतिलाई तीब्र पार्ने दिशामा थप सुधारको घोषणा गरेको छ ।

भारतीय राष्ट्रपति रामनाथ कोविन्दले संसद्को दुबै सदनको संयुक्त बैठकमा सम्बोधन गर्दै कृषि क्षेत्रमा अधिक लगानी तथा साना र घरेलु उद्योगलाई बिनाधितो ऋण उपलब्ध गराइने घोषणा गरेका हुन् ।

उनको भाषणामा हाल भारतमा मुद्रास्फिती कम रहेको, आर्थिक घाटा पनि न्यून रहेको, विदेशी विनिमयको सञ्चिती बढिरहेको र चाँडै भारत विश्वको पाचौं ठूलो अर्थतन्त्र बन्ने दिशामा अघि बढिरहेको जनाएका हुन् ।

भारतमा नयाँ आर्थिक वर्षको बजेट सार्वजनिक हुनुअघि राष्ट्रपति रामनाथ कोविन्दको भाषण सार्वजनिक भएको हो । नवनियुक्त भारतीय अर्थमन्त्री निर्मला सीतारमणले आगामी जुलाईमा नयाँ आर्थिक वर्षको बजेट प्रस्तुत गर्ने कार्यक्रम छ ।