काठमाडौं – सिनेमा घरमा कमालको व्यापार गरिरहेको चलचित्र ‘जात्रै जात्रा’ फिल्म छायांकनमा जानुपूर्व नै चर्चामा थियो । किनकि, यसको पहिलो भाग पनि हिट भएको थियो । सामान्य कथालाई रोचकताका साथ प्रस्तुत गरिएको यो फिल्मले छायांकनको घोषणासँगै टिजर सार्वजनिक गरेको थियो ।

टिजरमा असनको बजारमा फिल्मका तीन शीर्ष पात्र भागिरहेको देख्न सकिन्छ । यस्तै दोस्रो टिजरमा उनै तीन पात्र फणिन्द्र, जोयस र मुन्ना भाग्दै मर्ने योजना बनाएको र मर्न खोज्दा पनि पक्राउ परेको देखाइएको छ । यी दृश्य फिल्ममा भने छैनन् । जसकारण फिल्म हेरेका दर्शकलाई ती दृश्य नदेख्दा नरमाइलो महसुस पनि भइरहेको छ ।

यसैबीच हामीले फिल्मका लेखक तथा निर्देशक प्रदीप भट्टराईलाई सोध्यौँ – टिजरमा समावेश ती दृश्य किन राख्नुभएन ?

प्रश्नको उत्तरमा उनले ‘जात्रै जात्रा’ को कथा बुझाउनका लागि छुट्टै टिजर बनाइएको बताए । ‘हामीले टिजरमा पूरै फिल्मको थिम बुझाउन खोजेका हौँ, ती टिजरका कथा नै फरक हुन्, टिजरमा समावेश कथा नै फिल्मको विकसित कथा हो,’ निर्देशक भट्टराईले भने ।

दयाहाङ राई, विपिन कार्की, रविन्द्र झा, रविन्द्र सिंह बानियाँ, राजाराम पौडेल लगायतका कलाकारको शीर्ष भूमिका रहेको यो फिल्म कमेडी विधामा निर्माण भएको हो । फिल्मले कमेडीका माध्यमबाट समाजका कैयन् विकृतिमाथि पनि आवाज उठाएको छ ।