काठमाडौं– वैदेशिक रोजगारीमा गएका ५ सय ४५ जना नेपाली श्रमिक विभिन्न देशका जेलमा रहेको वैदेशिक रोजगार बोर्डले जानकारी दिएको छ ।

तीमध्ये १९ जना महिला रहेको बोर्डको तथ्यांक छ । जसमा सबैभन्दा धेरै मलेसियाको जेलमा २ सय ५ जना रहेको बोर्डले जनाएको छ ।

बोर्डका अनुसार युएईमा १ सय ८५ जना, कुवेतमा ५८ जना, कतारमा ३५, साउदी अरबको जेद्दामा ३१, साउदी अरबको रियादमा २३, बहराइनमा ५ जना र ओमानक जेलमा ३ जना रहेका छन् ।

विदेशी जलेमा रहेका नेपाली श्रमिकलाई उद्धारका लागि पहल गरिरहेको बोर्डले जानकारी दिएको छ । विदेशी जेलमा रहेका श्रमिक के कस्ता कारणले जेल परेका हुन भने विषयमा सम्बन्धीत देशसँग छलफल र परामर्श गरिरहेको बोर्डका कार्यकारी निर्देशक राजनप्रसाद श्रेष्ठले जानकारी दिएका छन् ।

जेमा रहेकामध्ये १९ जनालाई मृत्युदण्डको सजाय सुनाइएको छ । तीमध्ये मलेसियामा १६ जनालाई मृत्युदण्ड सुनाइएको छ । साउदी अरब रियादमा ५ जना, कुवेतमा ३ र युएईमा १ जनालाई मृत्युदण्ड सजाय तोकिएको छ ।

विदेशी जेलमा रहेकामध्ये ७ जनालाई आजीवन कारावासको सजाय गरिएको छ । २ जनालाई २५ वर्ष र २ जनालाई १५ वर्ष, ५ जनालाई १४ वर्षसम्मको सजाय सुनाइ गरिएको बोर्डले जानकारी दिएको छ ।

यसैगरी, ४४ जनालाई १ वर्षसम्मको र ७५ जनालाई ३ महिनासम्मको सजाय, १९ जनालाई १० वर्षसम्मको, १ जनालाई ५ वर्षसम्मको सजाय दिइएको छ । २ सय ९३ जना कामदारको सजायको फैसला नभएको बोर्डले जानकारी दिएको छ ।