काठमाडौं– नेपाल सरकारले जम्मू कश्मीर मामिलाबारे पहिलोपटक मुख खोल्दै नजिकबाट नियालिरहेको बताएको छ ।

भारतले संविधानको धारा ३७० खारेज गर्दै जम्मू कश्मीरलाई प्राप्त विशेष राज्यको दर्जा खोसेपछि उत्पन्न परिस्थितिका विषयमा नेपाल सरकारले बोलेको थिएन ।

सोमबार आयोजित पत्रकार सम्मेलनमा परराष्ट्रमन्त्री प्रदीप ज्ञवालीले जम्मू कश्मीर मामिलालाई नेपालले नजिकबाट नियालिरहेको बताएका हुन् ।

दिल्लीस्थित नेपाली दूतावासले जम्मू कश्मीरमा रहेका नेपालीको सुरक्षाबारे काम गरिरहेको पनि मन्त्री ज्ञवालीले जानकारी दिए ।

सार्कको अध्यक्ष समेत रहेको नेपालले भने भारत र पाकिस्तानबीचको विवादित क्षेत्र जम्मू कश्मीरको यो घटनाक्रमबारे अहिलेसम्म मुख खोलेको थिएन ।

मन्त्री ज्ञवालीले नेपाल क्षेत्रीय शान्ति र स्थिरताको पक्षमा रहेको बताए ।