काठमाडौं- श्रम, रोजगार तथा सामाजिक सुरक्षा मन्त्रालयले वैदेशिक रोजगारीमा कार्यरत श्रमिकलाई विदेशस्थित नेपाली नियोगहरुबाट पुनः श्रम स्वीकृति (रिइन्ट्री) जारी गर्ने सफ्टवेयरको निर्माण गरेको छ ।

गत फागुनमा वैदेशिक रोजगार ऐन २०६४ संशोधन भएपछि बढीमा दुई पटकका लागि नेपाली नियोगबाट पुनः श्रम स्वीकृति दिन सकिने व्यवस्था गरिएको छ ।

मलेसिया, खाडीका देश तथा मध्यपूर्वमा रोजगारीमा जाने नेपाली कामदार र पेशा व्यवसाय गरेर उतै बसेका गैर आवासीय नेपालीहरुले विगत लामो समयदेखि नै यो माग उठाउँदै आएका थिए । श्रम मन्त्रालयको निर्देशनमा वैदेशिक रोजगार विभागले सफ्टवेयर परीक्षण गरेको जानकारी दिएको छ ।
पसिना बगाएर मुलुकमा रेमिट्यान्स पठाउने कामदारलाई श्रम स्वीकृतिका नाममा लामो समय प्रतिक्षा गराएर अपमान र सास्ती दिने गरिएको उनीहरुको गुनासो रहँदै आएको छ ।

हाल, संस्थागत श्रम स्वीकृति, व्यक्तिगत नयाँ, वैधानिकिकरण र पुनः श्रम स्वीकृतिका माध्यमबाट श्रम स्वीकृति लिए नेपाली कामदार वैदेशिक रोजगारीमा जाने गरेको विभागले जनाएको छ । त्यसमा रिईन्ट्रीका माध्यमबाट जाने कामदारको संख्या पनि अत्यधिक छ ।

आर्थिक वर्ष २०७४÷०७५ मा पुनः श्रम स्वीकृतिको अनुमतिबाट जानेको संख्या तीन लाखभन्दा बढी रहेको विभागले जानकारी दिएको छ । नियोगबाटै श्रम स्वीकृति वितरण गर्दा नेपाल आउनुपर्ने समस्या समाधान हुने विभागको बुझाई छ ।

सरकारले पुनः श्रम स्वीकृति दिँदा वैदेशिक रोजगार कल्याणकारी कोष र बीमा अनिवार्य गरेको छ । सफ्टवेयरमा ति दुवै शुल्क सम्बन्धित मुलुकबाट भुक्तानी गर्न सकिने व्यवस्था अनलाइनबाट गरिएको विभागले जनाएको छ ।