काठमाडौं – चलचित्र ‘वीर विक्रम २’ ले शुक्रवारको तुलनामा शनिवार आशालाग्दो व्यापार गरेको छ । शुक्रवार औसत ओपनिङ गरेको यो फिल्मले शनिवार बिदाको दिन भने दर्शकको राम्रो साथ पायो । मल्टिप्लेक्स हलमा भने यो फिल्मले धेरै शो पाएको छैन । यद्यपि पाएका शोमा दर्शकको राम्रो साथ पायो ।

सिङ्गल थिएटरमा भने यो फिल्मले शनिवार सुखद् व्यापार गर्‍यो । शनिवार राजधानीका विभिन्न हलमा कलाकारको टिम पुगेको थियो । फिल्म हेरिसकेपछि दर्शकले कलाकारलाई प्रत्यक्ष भेटेका थिए ।

राजधानीको गोपीकृष्ण हलमा सिनेमा हेरेका दर्शकले फिल्म राम्रो लागेको प्रतिक्रिया दिँदै कलाकारको हौसला बढाएका थिए । हलबाहिर उपस्थित दर्शकले ‘एक दुई तीन छेपारो छिन्’ भन्दै हूटिङ गरेका थिए । फ्यानले कलाकारसँग सेल्फी खिच्दै खुशी साटेका थिए ।

मिलन चाम्सले निर्देशन गरेको यो फिल्ममा पल शाह, नाजिर हुसेन, वर्षा शिवाकोटी, बुद्धि तामाङ लगायतका कलाकारको शीर्ष भूमिका रहेको छ । लभस्टोरी मन पराउने दर्शकले यो फिल्म राम्रै लागेको प्रतिक्रिया दिएका छन् । प्रदीप भारद्वाजले स्किृप्ट लेखेका यो फिल्मले समीक्षात्मक रुपमा भने राम्रो प्रतिक्रिया पाउन सकेन ।