नेपालगन्ज– आठौं वृहत राष्ट्रिय खेलकुद प्रतियोगिता अन्तर्गत पुरुष फुटबलमा प्रदेश नम्बर ५ ले विभागीय टोली शसस्त्र प्रहरी बलको टोली एपीएफलाई पराजित गरेको छ । शुक्रबार खजुराको ‘डी’ गाउँमा भएको खेलमा प्रदेश ५ ले एपीएफलाई ३–२ गोल अन्तरले पराजित गरेको हो ।

एपीएफविरुद्ध प्रदेश ५ का लागि पुर्ण बहादुर गुरुङ, विवेक पुन र सुज्जु सेनले समान १–१ गोल गरे । विभागीय टोली एपीएफका लागि आशिस लामा र प्रदिप लामाले १–१ गोल गरे ।

पहिलो हाफमा एपीएफले अग्रता लिएपनि अग्रता जोगाउन नसक्दा विभागीय टोलीले खेल सुम्पिन पुग्यो । एपीएफका लागि खेलको १८ औँ मिनेटमा आशिसले गोल गर्दैसुरुवाती अग्रता दिलाएका थिए । त्यस्तै २६ औँ मिनेटमा प्रदिपले गोल गर्दै एपीएफले दोब्बेर अग्रता बनाएको थियो ।

प्रदेश ५ का लागि खेलको ४० औँ मिनेटमा पुर्ण बहादुरले, ४३ औँ मिनेटमा विवेकले र खेलको ७६ औँ मिनेटमा सन्जुले गोल गर्दै टिमलाई जीत दिलाएका हुन् ।