काठमाडौं– बंगलादेशमा जारी एसीसी इमर्जिङ टिम्स कपमा कमजोर प्रदर्शन गरेर मंगलबार नेपाल फर्किएको नेपाली क्रिकेट टोलीले दक्षिण एसियाली खेलकुद (साग)मा स्वर्ण जित्ने लक्ष्य राखेको छ ।

काठमाडौं ओर्लिएपछि कप्तान ज्ञानेन्द्र मल्लले नेपाली राष्ट्रिय क्रिकेट टोलीमा सुधार गर्नु पर्ने पक्ष धेरै रहेको बताउँदै उनले विशेष गरी ब्याटिङ पक्षमा धेरै सुधार गर्न सके सागमा स्वर्ण जित्ने दाबी गरे ।

‘भ्रमण ठिकै भयो । तर, सोचेजस्तो हुन सकेन । भारत र बंगलादेशसँग अझै राम्रो गर्न सकिन्थ्यो होाल । भारतसँग २३० रनभन्दा बढी रन बन्न सक्थ्यो । बंगलादेशसँग हामीले २०० रन नै छुन सकेनौं,’ कप्तान मल्लले विमानस्थलमा भने,‘तर उनीहरु राम्रो टिम पनि हुन ।  त्यो भन्दा पनि हामीले उनीहरुसँग प्रतिस्पर्धात्मक खेल खेल्न सकेनौं । टिममा सुधार गर्नु पर्ने कुराहरु धेरै छन् ।’

बंगलादेशमा खेल्दा नेपाली खेलाडीमा अनुभव कम हुँदा पनि समस्या भएको उनको भनाइ थियो । बलियो विपक्षी टिम भएकाले उनीहरुसँग खेल्न समस्या भएपनि केही कुराको अनुभव बटुलेकाे कप्तान मल्लले बताए ।

‘बलियो विपक्षी भएकोमा उनीहरुसँग विपक्षीलाई कसरी दबाबमा राख्ने भन्ने कुराहरु सिक्न पाइयो । खेल एक्सपोजर पाइयो भने विस्तारै ब्याटिङ सुधार हुन्छ जस्तो लाग्छ,’ मल्लले भने ।

शुरुका दुई खेलमा रन जोड्न नसकेका मल्लले अन्तिम बंगलादेशसँगको खेलमा २२ रन बनाएका थिए । तर, उनले आफूले राम्रो खेल्न नसकेको स्वीकारे ।

पूर्ण कप्तान भएपछिको पहिलो विदेश भ्रमणमा टिमका अन्य खेलाडीहरुले राम्रो साथ दिएको मल्लले बताए ।

मंसिर १५ देखि २४ सम्म आयोजना हुन लागेको सागमा स्वर्ण जित्ने लक्ष्य रहेको मल्लले बताएका छन् ।

‘घरमै हुन लागेको सागमा स्वर्ण जित्ने नै लक्ष्य हो,’ कप्तान मल्लले भने ।