काठमाडौं- वैदेशिक रोजगार विभागले संशोधित ऐनअनुसार धरौटी रकम नराख्न ५ सय ८६ वटा म्यानपावर कम्पनीको कारोवार बन्द गरेको छ ।

विभागले गत भदौ १८ गतेसम्म धरौटी नराखेका, मर्जरमा गएका म्यानपावर र विगतमै खोरजीमा परेका गरी ५ सय ८६ म्यानपावर कम्पनीका नाममा कुनैपनि कारोवार नगर्न सम्बन्धी पक्षलाइै सूचनामार्फत जानकारी गराएको छ ।

विभागले वैदेशिक रोजगार ऐन, २०६४ बमोजिमको बैंक ग्यारेन्टी र नगद धरौटी नराखेका २ सय १२ म्यानपावर, वैदेशिक रोजगार विभागमा अद्यावधिक नभएका कारोवार बन्द भएका १ सय ७० वटा र विगतमा २ सय ४ वटा म्यानपावर कम्पनी खारेज भएको भन्दै कारोवार नै प्रतिबन्ध लगाएको विभागले जनाएको छ ।

विभागले गत भदौ १८ गतेसम्म ८ सय ५४ म्यानपावर कम्पनीहरुले ऐनले तोकेको धरौटी र बैंक ग्यारेन्टी राखेको सार्वजनिक गरेको छ ।

विभागले खारेजीको सूचीमा समावेश नभएका तर विभागको अनलाईन सूचना प्रणालीमा निष्कृय देखाएका म्यानपावरको कारोवार रोक्काका विषयमा केही भनिएको छैन ।

विभागले विभागमा प्रतिबन्ध भएका म्यानपावरबाट कारोबार गरे गराएको पाएमा वैदेशिक रोजगार ऐन, २०६४ बमोजिम कारबाही गरिने चेतावनी दिएको छ ।

वैदेशिक रोजगार विभागले भाद्र महिनामा मात्रै वैदेशिक रोजगारी पीडितहरुलाई २ करोड १४ लाख नगद क्षतिपूर्ति भराएको छ । भने ,२ करोड ८५ लाख विगो दाबी सहित ४१ मुद्दा वैदेशिक रोजगार न्यायाधीकरणमा पठाएको विभागले जानकारी दिएको छ ।

त्यसैगरि ब्यवसायीहरुबाट १९ लाख ५० हजार जरिवाना समेत असूली गराएको छ ।