काठमाडौं– भारतकै ठूलो गायन रियालिटी शो सारेगमप लिटिल च्याम्पमा चौथो स्थान हात पार्न सफल आयुष केसीले चलचित्रको गीत गाउने भएका छन् ।

उनले विकासराज आचार्यको निर्देशनमा तयार भईरहेको चलचित्र ‘हजार जुनीसम्म’को टाइटल गीतमा गाउने भएका हुन् ।

उनले गाएको गीतमा बाल कलाकार अनुभव रेग्मीको अभिनय रहनेछ । चलचित्रमा अनुभवसँगै आर्यन सिग्देल, स्वस्तिमा खड्का, प्रियंका कार्की, संचिता लुइँटेल, सलोन बस्नेत, अखिलेष प्रधान, राजाराम पौडेल लगायतका कलाकारहरुको अभिनय छ ।

हजार जुनीसम्म’मा समावेश ‘एमजी रोडैमा’ र ‘आज नगद भोली उधारो’बोलको गीत यसअघि नै सार्वजनिक भैसकेका छन् । चलचित्रमा उदयराज सोताङ्ग, राजनराज सिवाकोटी, बसन्त सापकोटा र प्रविन पौडेलको संगीत, अर्जुन जिसीको सम्पादन छ ।

कविता रेग्मी चलचित्रकी कार्यकारी निर्माता हुन् भने विशाल चाम्लिङ निर्माता हुन् । चलचित्र आउँदो भदौ ६ गतेबाट प्रदर्शनमा आउनेछ ।