काठमाडौं– युरोपियन फुटबलको सर्वोच्च निकाय युईएफएका पूर्व अध्यक्ष मिचेल प्लाटिनी पक्राउ परेका छन् ।

अन्तर्राष्ट्रिय फुटबल महासंघ (फिफा) र युईएफएमा भ्रष्टाचार र आर्थिक अनियमितता गरेको आरोपमा उनलाई फ्रान्स प्रहरीले अनुसन्धान गर्न पक्राउ गरेको हो ।

प्लाटिनीलाई पेरिसबाट पक्राउ गरिएको अन्तर्राष्ट्रिय समाचार संस्थाहरुले जनाएका छन् । प्रक्राउपछि फ्रान्सका पूर्व लिजेण्ड ६३ वर्षीय प्लाटिनीलाई हिरासतमा राखिएको छ ।

कतारलाई सन् २०२२ को विश्वकप आयोजना गर्न अनुमति दिने क्रममा प्लाटिनीले ठूलो भ्रष्टाचार गरेको आरोप छ । तर, उनले पटक–पटक आफूमाथिको आरोप अस्वीकार गर्दै आएका छन् ।

प्लाटिनी अहिले फुटबलमा ८ वर्षको प्रतिबन्ध खेपिरहेका छन् । फिफाले तीन वर्षअघि पूर्व अध्यक्ष सेप ब्लाटर र उपाध्यक्ष रहेका प्लाटिनीलाई ८ वर्षको प्रतिबन्ध लगाएको थियो ।