ब्राजिल– ब्राजिलका राष्ट्रपति जइर बोलसोनारो अमेरिका भ्रमणमा निस्केका छन् । अमेरिकी राष्ट्रपति डोनाल्ड ट्रम्पसँग भेटवार्ता गर्नका लागि राष्ट्रपति बोलसोनारो अमेरिकाको राजधानी वाशिंटन डीसी पुगेका हुन् ।

ट्रम्प र बोलसोनारोबीच विशेषगरी भेनेजुएलामा जारी राजनीतिक संकटका विषयमा छलफल हुनेछ । भेनेजुएलाको विषयबाहेक दुई नेताबीच व्यापार, द्विपक्षीय सम्बन्ध, क्षेत्रीय सुरक्षा, भू राजनीतिलगायतका विषयमा पनि वार्ता हुनेछ ।

दुबै मुलुकबीच भेनेजुएलाका विषयलाई लिएर एकमत रहेको देखिन्छ । दुबै मुलुकले वर्तमान राष्ट्रपति निकोलस मादुरोलाई सत्ताच्यूत गरी विपक्षी नेता हुआँ गुआइदोलाई राष्ट्रपति बनाउन चाहन्छन् । त्यसबाहेक दुबै नेताहरुको पपुलिष्ट दक्षिणपन्थी छवि रहेको छ ।

गत जनवरी १ मा ब्राजिलको राष्ट्रपतिको कार्यभार सम्हालेयता बोल्सोनारोको यो पहिलो औपचारिक विदेश भ्रमण हो । त्यसअघि उनी स्विट्जरल्याण्डको डाभोसमा भएको विश्व आर्थिक मञ्चको सम्मेलनमा सहभागी भएका थिए ।

उनी मंगलबार स्वदेश फर्किने कार्यक्रम छ । ब्राजिल फर्किएलगत्तै उनले चिली र मार्चको अन्त्यमा इजरायलको भ्रमण गर्ने बताइएको छ ।