कंगो– अफ्रिकी मुलुक प्रजातान्त्रिक गणतन्त्र कङ्गोमा भएको रेल दुर्घटनामा ज्यान गुमाउनेको सङ्ख्या ३० पुगेको छ ।

प्रजातान्त्रिक गणतन्त्र कङ्गोको केसाई प्रान्तको प्रमुख शहर कनाङ्गाबाट १ सय ४० किलोमिटर उत्तरमा रहेको बेना लेका गाउँनजिक मालवाहक रेल दुर्घटनामा परको हो । दुर्घटनामा अन्य केही घाइते भएका छन् ।

लिकबाट बाहिर गएपछि रेल दुर्घटनामा परेको बताइएको छ । मालवाहक रेल दुर्घटनामा परी मृत्यु हुनेमा महिला तथा बालबालिका समेत रहेको अधिकारीले जनाएका छन् ।

यसअघि अन्तर्राष्ट्रिय सञ्चारमाध्यमले दुर्घटनामा २४ जनाको मृत्यु भएको उल्लेख गरेका थिए ।  प्रजातान्त्रिक गणतन्त्र कङ्गोमा रेलमार्गका पूर्वाधार निकै पुरानो भइसकेको तथा जीर्ण अवस्थामा रहेकोले प्रजातान्त्रिक गणतन्त्र कङ्गोमा बेलाबेला रेल दुर्घटनामा पर्दै आएका छन् ।

कमजोर रेल मार्ग, अत्यधिक यात्रु तथा सामानको भार र चालकको लापरवाहीका कारण त्यहाँ रेल दुर्घटनामा हरेक वर्ष सयौँ मानिसहरुको मृत्यु हुने गरेको छ ।