काठमाडौं- झारफुक गरी धार्मिक विधिबाट उपचार गर्ने भन्दै गुम्बामा लगेर बिरामी युवतीहरुलाई यौन हिंसा गरेको आरोपमा एक धर्मगुरुलाई ७ वर्षको जेल सजाय सुनाइएको छ ।

उच्च अदालत पाटनले एक धर्म गुरुलामालाई ७ वर्ष कैद र ३० लाख रुपैयाँ क्षतिपुर्तिको फैसला गरेको छ । यस अघि निर्दोष ठहर गर्दै जिल्ला अदालतको फैसला उल्ट्याउँदै उच्च अदालतका न्यायाधीशद्वय टेकनारायण कुँवर र रमेशबहादुर थापाको संयुक्त इजलासले धर्मगुरु लामा भिक्षुसहित उनकी सहयोगीलाई साइबर अपराधमा समेत दोषी ठहर गर्दै सो फैसला सुनाएको हो ।

काठमाडौको दक्षिणकाली चाल्नाखेलमा पेमा तासी छुलिङ घोम्बो कासुङ गुम्बा खोलेका रिम्पोछे छोल्टिम दोर्जे योन्तान योञ्जन टुल्कु लामा भनिने ज्ञानबहादुर लामालाई डर, त्रास, धाक देखाई करकापमा शरीर बन्धक राखी युवतीमाथि लगातार करणी गरेको ठहर गर्दै अदालतले उक्त फैसला गरेको हो ।

उच्च अदालत पाटनको फैसलापछि लगत्तै प्रहरीले लामालाई मंगलबार पक्राउ गरेको छ । लामाकी सहयोगी महिला मनिषा लामालाई आपत्तिजनक अवस्थाका फोटा फेसबुकमा अपलोड गरेको अभियोगमा अदालतले साइबर क्राइम अन्तर्गत दोषी ठहर गरेको छ ।