कञ्चनपुर- ग्रामीण क्षेत्रका नागरिकलाई यातायातमा सहज पहुँच पुर्‍याउने उद्देश्यले राष्ट्रिय ग्रामीण यातायात सुदृढीकरण कार्यक्रमअन्तर्गत कैलाी र कञ्चनपुरका सडक कालोपत्रे, ग्राभेल तथा पुल निर्माण गरिएको छ ।

पाँच वर्षअघि कैलाली र कञ्चनपुरलाई लक्षित गरी शुरु गरिएको कार्यक्रम अन्तर्गत सडक निर्माण, सडक स्तरोन्नति र पुल निर्माण गरिएका छन् ।

सो कार्यक्रमअन्तर्गत कञ्चनपुरमा स्तरोन्नतितर्फ ६ वटा सडक र दोधारा चादँनीको मलेरिया नालामा पक्की पुल निर्माण गरिएको राष्ट्रिय ग्रामीण यातायात सुदृढीकरण कार्यक्रमका इञ्जिनियर प्रदीपराज पन्तले जानकारी दिए ।

“हामीले स्तरोन्नति, पुलनिर्माण, नियमितमर्मत र आवधिक मर्मतलगायतका शीर्षकमा काम गर्‍यौँ”, इञ्जिनियर पन्तले भने, “कार्यक्रम सकिन करीब तीन महिना मात्रै बाँकी छ ।”

सो कार्यक्रमअन्तर्गत कञ्चनपुर र कैलालीमा गरी करीब रु ४४ करोड ५० लाख रकम खर्च भएको इञ्जिनियर पन्तले जानकारी दिए । उनले सडक पूर्वाधारको निर्माणले स्थानीयवासीलाई आवागमनमा सहजता मिलेको बताए ।

विश्व बैंकको आर्थिक सहयोगमा सञ्चालन गरिएको उक्त कार्यक्रमअन्तर्गत मलेरिया नालामा रु दुई करोड ५१ लाखमा निर्माणाधीन पुलको ८० प्रतिशत काम सकिएको उनले जानकारी दिए ।