अष्ट्रेलियामा धेरै नेपालीहरु अध्ययन, रोजगारी तथा भ्रमणका लागि जाने गरेका छन् । त्यहाँ रहँदा आफ्नै असावधानी वा कमिकमजोरीले पासपोर्ट हराउन सक्छ ।

अष्ट्रेलियामा पासपोर्ट हराइहाले के गर्ने ?

सर्वप्रथम आफ्नो पासपोर्ट हराएको हो वा होइन ? भन्ने यकिन गर्ने । पासपोर्ट हराएको निश्चित भइसकेपछि प्रहरी कार्यालयमा आफ्नो पासपोर्ट कहाँबाट, कहिले, जारी भएको हो ? पासपोर्टको म्याद कहिलेसम्म थियो इत्यादी विवरण दिने । त्यसपछि प्रहरीले तपाईंको पासपोर्ट हराएको निश्चित गरी एक पत्र दिन्छ ।

त्यसपछि तपाईंले नयाँ पासपोर्ट बनाउने प्रक्रिया थाल्नुपर्छ । यसका लागि तपाईंले राजदूतावासमा गई वैध भिसाको फोटोकपी, हराएको पासपोर्टको फोटोकपी तथा नेपाली नागरिकता प्रमाणपत्र र यसअघि पासपोर्ट हराएको भनी प्रहरीले दिएको पत्रसहित आवश्यक फाराम भर्नुपर्छ ।

योसँगै तपाईंले वयस्कको हकमा ४६० अष्ट्रेलियन डलर र नाबालिगको हकमा २३० अष्ट्रेलियन डलर तिर्नुपर्ने हुन्छ । त्यसपछि तपाईंले नयाँ पासपोर्ट पाउने प्रक्रिया शुरु हुन्छ ।