ब्रसेल्स– जर्मन रक्षामन्त्री उर्सुला भोन डर लियेन युरोपेली आयोगको अध्यक्षमा निर्वाचित भएकी छिन् । मंगलबार भएको मतदानमा उनी सामान्य बहुमतसहित निर्वाचित भएकी हुन् ।

६० वर्षीया उर्सुला ब्रसेल्समा मुख्यालय रहेको युरोपेली आयोगको सर्वोच्च पदमा पुग्ने पहिलो महिला पनि बनेकी छिन् । युरोपेली युनियन (ईयू)मा आबद्ध २८ मुलुकका सरकार प्रमुखले उर्सुलालाई समर्थन गरेका थिए ।

७ सय ५१ सदस्यीय युरोपेली संसदमा उर्सुलाले २८३ मत प्राप्त गरेकी थिइन् । उर्सुलाले आगामी नोभेम्बर १ देखि कार्यभार सम्हाल्ने छिन् । हाल युरोपेली आयोगको अध्यक्षमा जाँ–क्लाउड जँन्कर छन् । युरोपेली आयोगको अध्यक्षको कार्यकाल पाँच वर्षको हुने प्रावधान छ ।

मतदानपछि संसदलाई सम्बोधन गर्दै उनले बेलायतको बहिर्गमन पश्चात युरोपेली संघको अगाडि ठूला चुनौतीहरु रहेको र महत्वपूर्ण जिम्मेवारी आफ्नो काँधमा आएको बताइन् ।

उनले आफ्नो सम्पुर्ण प्रयत्न एकीकृत र बलियो युरोप बनाउनेतर्फ नै केन्द्रित हुने बताइन् । ब्रेक्जिटको मुद्दा चर्को रुपमा उठिरहेका बेला युरोपेली संघका सामुन्ने इटालीको ऋण तथा संघमा आबद्ध हंगेरी र पोल्यान्डबाट सिर्जित युरोपेली मूल्यमान्यता र कानूनमाथिको चुनौतीलाई सम्बोधन गर्नुपर्ने चुनौति रहेको बताइएको छ ।

जर्मन चान्सलर एङ्गेला मर्केलले आफूसँग लामो समयदेखि काम गरेकी उर्सुला विजयी भएकामा खुशी लागेको टिप्पणी गरिन् ।