काठमाडौं– उपप्रधान तथा रक्षामन्त्री ईश्वर पोखरेलले राष्ट्रिय सुरक्षा चुनौतीका विषयमा सवै सचेत हुनेपर्नेे बताएका छन् ।

सुरक्षा चुनौती राष्ट्रिय सिमाभित्र मात्र सीमित नरहने भन्दै उनले यसका लागि सवै राष्ट्रहरुबीच समन्वय, सहयोग र सहकार्यको आवश्यकता रहने बताएका हुन् ।

नेपाली सेनाले पहिलो पटक आयोजना गरेको राष्ट्रिय सुरक्षा र प्रतिआतंकवाद सम्बन्धी एक दिने अन्तरक्रिया कार्यक्रममा मन्त्री पोखरेलले आतंकवादी गतिविधि रोक्न राष्ट्रिय, क्षेत्रीय तथा अन्तर्राष्ट्रिय प्रयासको आवश्यकता रहेको औल्याए ।

उनले आतंकवाद मानवता र अन्तर्राष्ट्रिय सुरक्षामा जटिल चुनौती बन्दै गएको सन्दर्भमा यसलाई निर्मूल पार्न सवैको सहकार्यबाट मात्रै सम्भव हुने बताए ।

कार्यक्रममा विशेषज्ञ श्रीलंकाका प्राध्यापक डाक्टर रोहन गुणरत्नले आतंकवाद कुनै एक देशको समस्या नभई सामुहिक समस्या भएको जिकिर गरे । यसको निराकरणको लागि आन्तरिक रुपमा राज्यका विभिन्न संयन्त्रहरु परिचालित हुनेपर्ने बताए ।

उनले अन्तर्राष्ट्रि क्षेत्रमा मित्रराष्ट्रहरुबीच समेत आपसी समन्वय, सहयोग र सहकार्य अत्यन्तै महत्वपूर्ण रहने तर्क गरे ।
कार्यक्रममा ईजरायलका राजदूत वेन्नी ओमरले आफ्नो देशमा आतंकवादले खडा गरेका चुनौती र त्यसको निराकरणको लागि चालिएका कदमहरुबारे जानकारी गराएका थिए ।

कार्यक्रममा विभिन्न देशका राजदूतहरु, नेपाली सेनाका बहालवाला तथा अवकास प्राप्त रथी लगायत अन्य उच्चपदस्त अधिकारीहरु सहभागी भएका थिए ।