डाइभर्सिटी भिसा अर्थात् डीभी चिट्ठा कार्यक्रम बन्द गर्ने योजनासहित अमेरिकी राष्ट्रपति डोनाल्ड ट्रम्पले नयाँ आप्रवासन नीति अघि सारेका छन् ।

ह्वाइट हाउसको रोज गार्डेनमा उनले सार्वजनिक गरेको नयाँ आप्रवासन नीति अनुसार अब ग्रिनकार्ड दिन पनि कडाई गरिनेछ । यसका लागि कडा परीक्षा दिनुपर्ने तथा अहिलेका भन्दा थप प्रक्रिया पूरा गर्नु पर्ने जनाइएको छ ।

यसअघि हरेक वर्ष ११ लाख भन्दा धेरै मानिसहरुले ग्रिनकार्ड पाउने गरेकोमा दुई तिहाई भन्दा धेरै ग्रिनकार्ड अमेरिकामा परिवार रहेकालाई पारिवारिक सम्बन्धका आधारमा दिने गरिँदै आइएको थियो । तर, अब भने ग्रिनकार्ड दिन अब उच्च सीप भएका, अंग्रेजी राम्ररी बोल्नसक्ने र युवावर्गका आप्रवासीलाई प्राथमिकता दिइनेछ ।

ट्रम्पका अनुसार अब अमेरिकाले दिने ग्रिनकार्डको ५७ प्रतिशत हिस्सा यस्ता उच्च सीप र दक्षता भएका आप्रवासीले ओगट्नेछन् ।

यद्यपि उनको नयाँ नीति डेमोक्र्याटिक पार्टीको बहुमत रहेको कंग्रेसको तल्लो सदनबाट पारित हुनेमा भने आशंका रहेको अमेरिकी सञ्चारमाध्यमले जनाएका छन् ।