सुडान– सुडानका अपदस्त राष्ट्रपति ओमर अल बसिरलाई आफ्नो आवासबाट कारागारमा सारिएको छ ।

उनलाई हाल राजधानी खार्तुममा रहेको कोबर कारागारमा सारिएको उनको पारिवारिक श्रोतलाई उद्धृत गर्दै समाचार संस्था एएफपीले जनाएको छ । खार्तुमको उत्तरी भेगमा रहेको त्यस कारागारमा हाल ठूलो सङ्ख्यामा सुरक्षाकर्मी परिचालन गरिएको बताइएको छ ।

हाल बसिरलाई राखिएको कारागारमा यसअघि बसिरले बन्दी बनाएका राजनीतिक नेताहरुलाई पनि राखिने गरेको बताइन्छ ।

मूल्यबृद्धिको विरोधमा महिनौंसम्म सरकारविरोधी प्रर्दशनपछि गत बिहीबार सेनाले कु गरी विगत ३० वर्षदेखि सत्तामा रहेका बसिरलाई अपदस्थ गरी सैनिक शासन शुरु गरेको थियो ।

यद्यपि प्रदर्शनकारीले भने मुलुकको सत्ता नागरिक सरकारलाई हस्तान्तरण गर्न माग गर्दै प्रदर्शन गरिरहेका छन् ।