काठमाडौं– प्रधानमन्त्री केपी शर्मा ओलीले नेत्र विक्रम चन्द समूहलाई प्रतिबन्ध लगाएकोमा रुवाबासी नगर्न प्रमुख प्रतिपक्ष दल नेपाली काँग्रेसलाई आग्रह गरेका छन् । चन्द समूह मान्यताप्राप्त संस्था नभएकाले सरकारले नचिन्ने अनाधिकृत समूह मात्रै भएको प्रधानमन्त्री ओलीले जनाए ।

आइतबार विराटनगर विमानस्थलमा सञ्चारकर्मीमाझ उनले बम पड्काउने, चन्दा आतंक फैल्याउने लगागतका आपराधिक गतिविधि गरेकाले सो समूहलाई प्रतिबन्ध लगाउने निर्णय लिनु परेको पनि स्पष्ट पारे । यस्ता आपराधिक गतिविधिमा संलग्न समूहलाई प्रतिवन्ध लगाउँदा आफूहरु लोकतान्त्रिक पार्टी र नेताहरु भन्नेको रुवाबासी किन ? प्रधानमन्त्री ओलीको प्रश्न थियो ।

प्रधानमन्त्री ओलीले देशमा धम्क्याउने, लुटपाट गर्ने छुट कसैलाई नभएको पनि बताए । उनले फरक प्रसंगमा मन्त्रीमण्डल हेरफेर गर्ने कुनै योजना नभएको पनि स्पष्ट पारे । उनले भने, ‘एउटा मन्त्रालय खाली छ । त्यसलाई पूर्णता दिने एउटा कुरा हो । तर मन्त्रीमण्डल हेरफेरको कुनै योजना छैन ।’