काठमाडौं – लभस्टोरी फिल्म मेकिङमा छुट्टै छाप छोड्न सफल निर्देशक सुदर्शन थापाको निर्देशनमा तयार भइरहेको फिल्म ‘म यस्तो गीत गाउँछु २’ को सेटबाट केही तस्वीर सार्वजनिक गरिएका छन् । ती तस्वीरमा फिल्मका शीर्ष कलाकार पल शाह र पूजा शर्मालाई देख्न सकिन्छ ।

संगीतकार अर्जुन पोखरेलको संगीतमा तयार भएको ‘तिम्रो घरको वरिपरि’ बोलको गीत छायांकनका क्रममा खिचिएका केही तस्वीर सार्वजनिक गरिएको हो । तस्वीरमा पल र पूजाको रोमान्स देख्न सकिन्छ ।

निर्माण टिमका अनुसार यो गीतको छायांकनका लागि ५ सय कोरस राखिएको छ । गीतमा अस्मिता अधिकारी र सोनम तोप्देनको स्वर सुन्न सकिन्छ ।

रामजी लामिछानेले कोरियोग्राफी गरिरहेको यो गीतको भिडियोमा सौरभ लामाको छायांकन छ । झण्डै ७ दिन लगाएर भिडियोको शूटिङ गरिएको हो ।

‘म यस्तो गीत गाउँछु’ को सफलतापछि सोही फिल्मका शीर्ष कलाकारलाई लिएर निर्माण गरिएको फिल्म ‘म यस्तो गाउँछु २’ पनि लभस्टोरी फिल्म हुनेछ । फिल्ममा पल शाह र पूजा शर्माको रोमान्स देख्न सकिनेछ ।

शिवम अधिकारीले लेखेको फिल्ममा दिनेश डिसी, हरिहर शर्मा लगायतका कलाकारको पनि शीर्ष भूमिका रहनेछ ।