काठमाडौं- रोजर फेडेररलाई सेमिफाइनल मै हराएर स्टेफानोस सिट्सिपासले चुनौती दिएका छन् । यही चुनौतीसँगै एटिपी फानल्स टेनिसको उपाधिका लागि स्टेफानोस सिट्सिपास र डोमिनिक थिएमबिच प्रतिस्पर्धा हुने भएको छ ।

२१ वर्षका ग्रिक खेलाडी स्टेफानोसले ६ पटकका विजेता रोजर फेडेररलाई पराजित गरेर फाइनलमा स्थान पक्का गरेका हुन् । लण्डनमा भएको खेलमा स्टेफानोसले ३८ वर्षका स्वीस खेलाडी फेडेररलाई ६–३ र ६–४ को सेटमा पराजित गरेका हुन् ।

अर्को सेमिफाइनलमा साबिक विजेता एलेक्जान्डर स्भेरेभ पाँचौँ बरियताका डोमिनिक थिएमसँग पराजित भए । अस्ट्रियन थिएमले स्भेरेभलाई ७–५ र ६–३ को सेटमा पराजित गरेका हुन् ।

२६ वर्षका थिएम र २१ वर्षका स्टेफानोस दुवैका लागि एटिपी फाइनल्सको उपाधि उनीहरुको खेल जीवनको सबैभन्दा ठूलो सफलता बन्ने छ ।