काठमाडौं– प्रतिनिधिसभाको उद्योग तथा वाणिज्य र श्रम तथा उपभोक्ता हित समितिले खाडीका देश र मलेसियामा कार्यरत घरेलु महिला कामदारको पुनः श्रम स्वीकृति तत्काल नखुलाउन सरकारलाई निर्देशन दिएको छ । श्रम, रोजगार तथा सामाजिक सुरक्षा मन्त्रालयले समितिमा खाडीका देशमा रहेका महिला कामदारको पुन: श्रम स्वीकृति खुलाउन माग गरेको थियो ।

तर, बुधबार उद्योग तथा वाणिज्य र श्रम तथा उपभोक्ता हित समितिमा भएको छलफल पछि सम्बन्धित मन्त्रीको स्पष्ट धारणा नआएसम्म समितिले पुनः श्रम स्वीकृति खुलाउन नसकिने जानकारी मन्त्रालयलाई गराएको थियो ।

खाडीका देश र मलेसियामा नेपाली महिला खसीबोका जस्तै विक्री भइरहेको भन्दै तत्कालीन व्यवस्थापिका–संसद्को अन्तराष्ट्रिय सम्बन्ध तथा श्रम समितिले ती देशमा महिला कामदार पठाउन रोक लगाउन सरकारले निर्देशन दिएको थियो । सोही निर्देशनअनुसार २०७२ चैत २० गते सरकारले खाडी मुलुकमा घरेलु कामदार पठाउने कार्यमा रोक लगाएको थियो ।

सरकारले खाडी मुलुकमा घरेलु कामदार पठाउन रोक लगाएपछि २०७२ सालअघि खाडी गएका कामदारले आफ्नो परिवारसँग भेट्न र स्वदेश फर्किन पाएका छैनन् ।

यसरी श्रम अवधि सकिएर विदेशमा रहेका महिला कामदार सहजीकरण गर्नेका लागि पहल मन्त्रालयले गरेको श्रम मन्त्रालयका सचिव महेश दाहालले जानकारी दिएका छन् ।

कतिपय घरेलु महिला कामदाररले पर्याप्त सुविधा, सेवा र पारिश्रमिक पाएका कारण त्यस्ता कामदारलाई पुनः स्वीकृति दिएर बाटो खुलाउन श्रम मन्त्रालयले समितिमा आग्रह गरेको उनको भनाइ छ ।