काठमाडौं – नेपाली महिला भलिबल टोलीले ऐतिहासिक सफलता हात पारेको छ । बंगलादेशमा भएको पहिलो संस्करणको एसियन भलिबल कन्फेरेडेसन (एभिसी) सेन्ट्रल जोन भलिबल च्याम्पियनसिपमा उपाधि हात पारेको महिला टोलीका लागि यो पहिलो अन्तर्राष्ट्रिय उपाधि हो ।

बिहीबार भएको फाइनलमा नेपाली महिला टोलीले माल्दिभ्सलाई ३–० को सोझो सेटमा पराजित गर्दै उपाधि हात पार्यो । नेपाली महिला टोली एभिसीमा अपराजित रहँदै उपाधि हात पार्न सफल भएको हो ।

यसअघि सन् २०१४ मा काठमाडौंमा भएको दक्षिण एसियाली आमन्त्रण महिला भलिबल च्याम्पियनसिपमा नेपाली टोलीले रजत पदक जितेको थियो भने दक्षिण एसियाली खेलकुद (साग) मा तीन कास्य जितेको छ ।

नेपालले माल्दिभ्ससँग पहिलो सेट २५–१३ ले जितेको थियो भने दोस्रो सेटमा २५–१२ र तेस्रो सेटमा २५–८ ले पाखा लगाउँदै नेपाल उपाधि चुम्न सफल भयो ।

राउण्ड रोविन लिगका आधारमा भएको प्रतियोगितामा यस अघि नेपालले माल्दिभ्स,अफगानिस्तान, कीर्गिस्तान र बंगलादेशलाई सोझो सेटमा पराजित गरेको थियो । जिवर्तमान कप्तानसहित ६ जना खेलाडीलाई आराम दिएर एभिसीका लाटि टोली छनोट गरेको भलिबल संघले एभिसीमा स्वर्ण जित्ने दाबी गर्दै आएको थियो भने अब यहिँ टोलीले १३ औं दक्षिण एसियाली खेलकुद (साग) खेल्नेछ ।