काठमाडौं– संघीय मामिला तथा सामान्य प्रशासन मन्त्री लालबाबु पण्डितले कर्मचारीको गालीगलौच सहेर भएपनि आफूले समायोजनको कामलाई पूर्णता दिएको बताएका छन् ।

समायोजनका बेला केही कर्मचारीहरु आफूविरुद्ध व्यक्तिगत गालीगलौचमै उत्रिएको पनि मन्त्री पण्डितको गुनासो छ ।

बिहीबार संघीय संसदको राज्य व्यवस्था तथा सुशासन समितिको बैठकमा बोल्ने क्रममा मन्त्री यादवले कर्मचारी समायोजनका बेला झेल्नु परेको ‘सकस’ सम्झिए ।

समायोजनका बेला केही कर्मचारीले आफूहरुले भनेको ठाउँभन्दा अन्त खटाइए थुकिदिने भनेर धम्की दिएको पनि मन्त्री पण्डितले स्मरण गरे ।

प्रस्तावित संघीय निजामति ऐनको छलफलमा भाग लिँदै मन्त्रीले भने, ‘२ जना उपसचिवज्यूहरु हानौला झैं गरेर आउनुभएको थियो, हामीले तपाईंले खटाएको ठाउँमै किन जाने भनेर भन्नुभयो । उहाँहरुले आफूलाई अन्त खटाए तपाईंलाई सबैभन्दा खराब मन्त्री भनेर थुक्छु पनि भन्नुभयो ।’

मन्त्री पण्डितले कर्मचारीहरुमा विदेश भ्रमणको मोह बढेको पनि बताए । कर्मचारीहरु कामप्रति जिम्मेवार नदेखिएको उल्लेख गर्दै मन्त्री पण्डितले भने, ‘एक जना सहसचिवले वर्षको २१० दिन त विदेश भ्रमणमै विताएको विवरण पनि फेला पारेको छु । त्यस्ता कर्मचारीले देशमा कति दिन काम गर्छन् होला ?’