कास्की-साझा पार्टीले कास्की क्षेत्र नम्बर २ को उम्मेद्वार बनाउने भएपछि कांग्रेस नेतृ रजनी केसीले राजीनामा दिएकी छन् ।

उनले सामाजिक सञ्जाल फेसबुकबाट आजैका दिनदेखि लागू हुने गरी कांग्रेसको सदस्यता त्याग गरेको घोषणा गरेकी छन् ।

उनले लेखेको फेसबुक स्टाटस यस्तो छ:

उनले आजै साझा पार्टी प्रवेश गरेकी छन्। साझा पार्टीले पोखरामा कास्की र पोखरा महानगर संयोजक घोषणा गर्न आयोजना गरेको कार्यक्रममा केसी साझा प्रवेश गरेकी हुन्। साझाले उनलाई कास्की क्षेत्र नम्बर २ मा मंसिर १४ गते हुने उपनिर्वाचनमा उम्मेदवार बनाउने तयारी गरेको छ ।

को हुन केसी
पोखरा विश्वविद्यालयमा उपप्रशासक केसी २० वर्षे सेवावधि सकेर पेन्सन पाकेपछि उक्त पदबाट राजीनामा गरी साझा पार्टी प्रवेश गरेकी हुन्। उनको राजीनामा कात्तिक १ गतेदेखि लागु हुने गरी विश्वविद्यालयले स्वीकृत गरेको छ।

कांग्रेसमा लाग्दा पनि कुनै परिवर्तन र सुधारको संकेत नपाएरै बिना मोलमोलाई साझामा प्रवेश गरेको केसीले बताइन्।

नेविसंघ हुँदै नेपाल महिला संघ र कांग्रेसमा सक्रिय नेतृ केसी २०५० को मध्यतिर पृथ्वीनारायण क्याम्पसको स्ववियु निर्वाचनमा सदस्य उम्मेदवार थिइन्।

केसीले साझाको नीति र कार्यक्रमबाट प्रभावित भएरै कांग्रेस छाडेर साझा प्रवेश गरेको उल्लेख गरिन्।

कास्की क्षेत्र नम्बर २ तत्कालीन पर्यटनमन्त्री रवीन्द्र अधिकारीको निधनपछि रिक्त भएको हो।

साझा पार्टीले आइतबार कास्की संयोजक अर्जुन खनाल र महानगर संयोजक मनकाजी गुरुङलाई घोषणा गरेको छ। खनाल व्यवसायी र गुरुङ निजी विद्यालय सञ्चालक हुन्। खनाल नेकपामा सक्रिय थिए।