काठमाडौं- वरिष्ठ मानसिक रोग विशेषज्ञ डाक्टर विश्वबन्धु शर्माको उपचार अनुभवमा आधारित ‘मान्छेको मन’ नामक पुस्तक सार्वजनिक भएको छ ।

चार दशकदेखि मनोचिकित्सा क्षेत्रमा कार्यरत डा शर्माले आफूसँग उपचारका लागि आएका मनोरोगीहरूको मनोभावना, मनोरोगका बिरामीको उपचार पछिको सफल जीवन तथा आफ्नै जीवनका भोगाइहरू पुस्तकमा समेटेका छन् ।

डा शर्माको पुस्तक मान्छेको मन मञ्जरी पब्लिकेशन प्रालिले बजारमा ल्याएको छ । शनिबार पुस्तकको विषयमा जानकारी दिदै डाक्टर शर्माले आफूले उपचारको क्रममा भेटेका मनोरोगीको मनका कुरालाई पुस्तकमा समेटेको बताए ।

कार्यक्रम पुस्तकका सम्पादक लक्ष्मण अधिकारीले डाक्टर शर्माले लेखेको मान्छेको मनले नेपालीको मानसिक स्वास्थ्य समस्यका विरामी र मनोरोग अवस्थाबारे जानकारी हुने बताए ।

यस्तै जनस्वास्थ्य विज्ञ डा रवीन्द्र समिरले पनि डा शर्माको पुस्तक नेपालीको मानसिक स्वास्थ्य अवस्थाको चित्र भएको बताए । डा शर्माको पुस्तक साहित्य प्रेमीका लागि मात्र नभइ स्वास्थ्य क्षेत्रका सबै सरोकारवाला व्यक्ति, मेडिकल विद्यार्थीहरू र चिकित्सकले समेत पढ्नै पर्ने पुस्तक रहेको बताए ।

डा शर्माले यसअघि पनि मानसिक स्वास्थ्यका विविध अनुभव नामक पुस्तक बजारमा ल्याएका थिए ।