विराटनगर– मादक पदार्थ सेवन गरी ड्युटीमा रहेका प्रहरीमाथि हातपात गरेको आरोपमा समाजवादी पार्टीका नेता उमेश यादवलाई प्रहरीले पक्राउ गरेको छ ।

मंगलबार राति विराटनगर रोडशेष चोकमा मादक पदार्थ सेवन गरी मोटरसाइकल चलाएको पाएपछि प्रहरीले यादवलाई रोकेको थियो । मोटरसाइकल रोकेपछि यादवले प्रहरी जवान श्यामकुमार चौधरीमाथि हातपात गरेका थिए ।

ड्युटीमा रहेका प्रहरीमाथि कुटपिट भएपछि प्रहरीले पछाडि बसेका यादव र मोटरसाइकल चालकलाई पनि पक्राउ गरेको थियो । मोटरसाइकल चालक बुधबार बिहान छुटेका छन् ।

पक्राउ परेका यादवमाथि अभद्र व्यवहार मुद्दामा अनुसन्धानका लागि सात दिनको म्याद थप गरिएको जिल्ला प्रहरी कार्यालय मोरङका डिएसपी राजकुमार खिइजुले जानकारी दिए ।

यादव स्थानीय तहको चुनावमा संघीय समाजवादी फोरम र तत्कालिन माओवादी गठबन्धनबाट मेयरमा उम्मेदवारी दिएका व्यक्ति हुन् । उनी तत्कालिन संघीय समाजवादी फोरमको मोरङ जिल्लाको पूर्वअध्यक्ष पनि हुन् ।