मुम्बई – एउटै फिल्मबाट चर्चामा आउने नायिकाहरुको सूची खासै ठूलो छैन । गत वर्ष सिनेमा उद्योगमा डेब्यु गरेका कैयन् नायिकामा उपासना सिंह ठकुरीको पनि इन्ट्री भयो । युवा अभिनेता अनमोल केसीसँग उनी फिल्म ‘क्याप्टेन’ मा देखिएकी थिइन् । फिल्म त चलेन तर उपासनाको चर्चा भने चलिरह्यो । यतिबेला उनको चर्चा झनै थपिएको छ ।

नायिका उपासना सिंह ठकुरीले दोस्रो फिल्मका रुपमा चलचित्र ‘कबड्डी ३’ मा अभिनय गर्ने भएकी छिन् । यो फिल्मको नाम ‘कबड्डी कबड्डी कबड्डी’ राखिएको छ । निर्माण टिमका अनुसार उपासनाको भूमिका पनि फिल्ममा मुख्य हुनेछ । उनका लागि एउटा संयोग जुरेको छ – उपासनाले हेरेको पहिलो नेपाली फिल्म थियो, कबड्डी । यसको तेस्रो सिक्वेलमा स्वयम् उपासनाले अभिनय गर्ने भएकी छिन् ।

पहिलो फिल्मबाटै राम्रो चर्चामा आएकी उपासनाले ‘कबड्डी ३’ मा कस्तो काम गर्छिन्, त्यसले उनको करिअरलाई मापन त गर्ला नै । अहिले भने यो फिल्ममा काम गर्न पाउँदा निकै खुशी भएको उनी बताउँछिन् । ‘कबड्डी मैले हेरेको पहिलो नेपाली फिल्म हो, यो टिमसँग काम गर्न पाउँदा एकदमै खुशी छु,’ उपासना भन्छिन् ।

मल्टिस्टारर फिल्म ‘कबड्डी ३’ मा दयाहाङ राई, कर्मा, माओत्से गुरुङ, विल्सन विक्रम राई, लुनिभा तुलाधर, विजय बराल लगायतका कलाकारले अभिनय गर्नेछन् । यो फिल्मका निर्देशन रामबाबु गुरुङ हुन् ।