एजेन्सी– अष्ट्रेलियन प्रधानमन्त्री स्कट मरिसनले क्रिसमस टापुमा रहेको विवादास्पद आप्रवासी बन्दीगृह पुनः खोल्ने जनाएका छन् ।

यसअनुसार अब अष्ट्रेलिया जाने अवैधानिक आप्रवासीलाई क्रिसमस टापुमा रहेको बन्दीगृहमा बन्दी बनाइने छ । अष्ट्रेलियाकै प्रशासनमा रहेको क्रिसमस टापु अष्ट्रेलियाबाट २५ सय किलोमिटर पश्चिममा हिन्द महासागरमा अवस्थित छ ।

अष्ट्रेलियाले त्यसबाहेक पपुवा न्यूगिनीको मानुस टापु र नाउरुमा पनि अवैधानिक आप्रवासीलाई बन्दीगृहमा राख्ने गरेको छ ।

क्रिसमस टापुको आप्रवासन बन्दीगृह गत वर्ष बन्द गरिएको थियो । त्यस्ता बन्दीगृहमा यताना र अन्य जघन्य अमानवीय ज्यादती हुने गरेको संयुक्त राष्ट्रसंघ लगायतका अन्तर्राष्ट्रिय संघ संगठनले प्रतिवेदन निकाल्दै आएका छन् ।