काठमाडौं – गायिका अञ्जु श्रेष्ठको स्वरमा रहेको आधुनिक शैलीको गीत ‘जाँदैछु’ को भिडियो सार्वजनिक गरिएको छ । गायिका श्रेष्ठको आफ्नै रचना रहेको यो गीतलाई ओएसआर डिजिटलको युट्युब च्यानलमार्फत सार्वजनिक गरिएको हो ।

गीतको भिडियोमा नायिकाद्वय केकी अधिकारी र बसुन्धरा भुसालको अभिनय छ । भिडियोमा बसुन्धरा र केकीले आमाछोरीको भूमिकामा अभिनय गरेका छन् । साथै गीतमा घर छोडेर विदेश जानुपरेको पीडालाई गायिका श्रेष्ठले शब्दमा उनेकी छिन् ।

उक्त गीतमा सुनील राईको संगीत छ भने मनोज सङसोनको एरेन्ज छ । गीतलाई पुष्कर श्रेष्ठले निर्माण गरेका हुन् ।

ज्ञानु राईले निर्देशन गरेको गीतको भिडियोमा अशोक मल्लको सम्पादन छ ।

गायिका अञ्जु बेलायतमा बस्दै आए पनि नेपाली गीत संगीत क्षेत्रमा पनि उत्तिकै सक्रिय छिन् । सानैदेखि गीत संगीतमा रुचि राख्ने श्रेष्ठले नाटक तथा गीत लेखन समेत गरेकी छिन् । सन् १९९३ मा हङकङमा पहिलोपटक गीत रेकर्ड गराएकी अञ्जुले यतिबेला सन्देशमूलक गीत ल्याएर बजारमा आएकी हुन् ।

ओखलढुंगामा जन्मिएकी गायिका श्रेष्ठ उदयपुरको गाईघाट र सप्तरीको राजविराजसँग पनि उत्तिकै नजिक छिन् । उनले आफ्नो उर्जाशील केही समय यी जिल्लाहरुमै व्यतित गरिन् । सानैदेखि गायनमा रुची राख्ने श्रेष्ठ गीतका अलावा कथा, कविता, चित्रकला र नृत्यमा पनि उत्तिकै चासो राख्थिन् ।

पेशाले डेन्टल नर्स रहेकी उनी सांगीतिक क्षेत्रमा पनि उत्तिकै सक्रिय छिन् । गीतका अलावा उनी सामाजिक कार्यमा पनि उनको सक्रियता छ । ‘सेवा नै सबैभन्दा ठूलो धर्म हो’ भन्ने उनी विभिन्न संघ संस्थामा आवद्ध रहेर सामाजिक कार्य गर्दै आएकी छिन् ।

उनी ‘मिसेस नेपाल–२०१७’ को प्रतिस्पर्धामा उनले आफ्नै निर्देशनमा नाटकमा एकल अभिनय प्रस्तुत गरेर १६ प्रतिस्पर्धीलाई उछिन्दै मिसेस ट्यालेन्टको उपाधि जित्न सफल भएकी थिइन् ।

त्यतिमात्र नभएर उनको लेखन रहेका दुई वटा नाटकहरु बेलायतमा मञ्चन भइसकेका छन् । ती नाटकहरुको मञ्चनबाट उठेको रकम उनले सामाजिक कार्यमा सहयोग प्रदान गरेको जनाइन् । एउटा नाटकको मन्चनबाट उठेको रकम र मिसेस नेपाल यु के २०१७ को टीमबाट प्राप्त सहयोग भक्तपुरस्थित एक संस्थामा रहेका मस्तिष्क पक्षघात भएका बालबालिकाहरुको उपचारका लागि प्रदान गरिएको जनाइन् ।

त्यसैगरी अर्को नाटकबाट उठेको रकम र एनआरएनए युकेको सयोगमा सामाजिक कार्यमै खर्चिएको जनाइन् । उनी सन् २००६ यता बेलायतमै बसोबास गर्दै आएकी छिन् ।

उनले आगामी दिनमा पनि दर्शक र श्रोताका लागि नयाँ गीत ल्याएर आउने खबरहबलाई बताइन् ।