नायिका उपासना सिंह ठकुरीले अहिलेसम्म २ फिल्ममा अभिनय गरिन् । उनको डेब्यु फिल्म ‘क्याप्टेन’ खासै नचले पनि चर्चा भने खुबै भयो ।

फिल्ममा उपासनाले देखाएको अभिनय क्षमताको धेरैले तारिफ गरे । उपासनाले ‘क्याप्टेन’ मा अनमोल केसीसँग जोडी बाँधेकी थिइन् भने ‘कबड्डी ३’ मा दयाहाङ राईसँग ।

‘कबड्डी ३’ अभिनय गरेपछि धेरै मेकरको आँखा उपासनामा पर्‍यो । तर, उपासनाले धेरै फिल्ममा काम गर्न चाहिनन् । बरु उनले राम्रो ब्यानरको खोजीमा रहिन् ।

कतिपयले त ‘कबड्डी ३’ चल्नुको कारण उपासना र दयाहाङ राई हुन् समेत भन्छन् । यद्यपि फिल्म चल्ने कन्टेन्टका कारणले हो । त्यसको प्रस्तुतीकरणका आधारमा हो ।

जे होस्, उपासनालाई यो फिल्मले पनि स्याबासी दियो । यसको सफलताको ब्याज र वाहवाही उनले अझै पनि पाइरहेकी छिन् । फिल्म रिलिजकै क्रममा उनले देशबाहिर पनि पुगिन् ।

तर, उपासना अब तेस्रो फिल्मका लागि भने आतुर छैनिन् ।

उनी तेस्रो प्रोजेक्ट पनि राम्रो होस् भन्ने चाहन्छिन् । जुन फिल्म पनि सफल बनोस् र सफल फिल्ममा ह्याट्रिक हान्न पाइयोस् ।

अहिलेलाई उपासनाको फ्यान फलोइङ क्रेज ठूलो छ । यो बेलामा उनले राम्रा मात्र फिल्म छानेर त्यही अनुसारको पात्र चयन गर्न सकिन् भने उपासनाको क्रेज धेरै वर्ष रहने पक्का छ ।

तर नेपालमा कलाकारको क्रेज निकै छोटो समयमा रहने र हराउने भइरहन्छ । उपासनाले यसपछि कस्तो फिल्म दिनेछिन्, त्यसले त करिअरलाई प्रभाव पार्ने नै छ ।