काठमाडौं – किर्गिस्तानको नादेझ्दा कपमा नेपाली राष्ट्रिय महिला टोली उज्वेकिस्तानसँग पराजित भएको छ । काराकोलस्थित सेन्ट्रल स्टेडियममा बिहीबार भएको फाइनलमा नेपाली महिला टोली उज्वेकिस्तानसँग ३–२ गोलले पराजित भएको हो ।

खेलमा कमजोर देखिएको नेपाल दोस्रो हाफमा भने लयमा फर्किएको थियो । नेपालविरुद्ध ३ गोल गरेको उज्वेकिस्तानका खेलाडीले नेपाली डिफेन्ड लाइनलाई कमजोर बनाएका थिए ।

३–० गोलले पछि परेको नेपाली महिला टोलीले दोस्रो हाफमा सुधारिएको प्रदर्शन गर्दै २ गोल फर्काएको थियो । नेपालका लागि दुवै गोल सावित्रा भण्डारीले गरिन् । नेपालका लागि पहिलो गोल ६७ औं मिनेटमा सावित्राले गरेकी थिइन् । दोस्रो गोल पनि सावित्राले नै गरेकी हुन् । खेलको निर्धारित समयको अन्तिम मिनेटमा नेपालले पाएको पेनाल्टीको सदुपयोग गर्दै सावित्राले दोहोरो गोल गरेकी हुन् ।

समूह चरणको खेलमा पनि नेपाली टोली उज्वेकिस्तानसँग पराजित भएको थियो । नेपालले किर्गिस्तान र ताजकिस्तानलाई पराजित गर्दै फाइनलको यात्रा तय गरेको हो ।

१३ औं दक्षिण एसियाली खेलकुद (साग) को अभ्यास खेलका रुपमा नेपाली टोली किर्गिस्तान पुगेको हो ।