काठमाडौं– उद्योग, वाणिज्य तथा आपूर्तिमन्त्री मात्रृकाप्रसाद यादवले ‘विषादी प्रकरण’लाई लिएर कांग्रेसले सरकारको आलोचना गर्न नसुहाउने बताएका छन् ।

मन्त्री यादवले भारतबाट आयातित तरकारी तथा फलफूलको विषादी परीक्षण गर्ने आँट गरेको सरकारलाई कांग्रेसले आलोचना गर्न नसुहाउने मन्त्री यादवको भनाइ थियो ।

कांग्रेसको सरकारले जनतालाई अर्गानिक तरकारी र फलफूल खुवाएको जस्तो पारामा वर्तमान सरकारको आलोचना गरेको मन्त्री यादवको आरोप थियो ।

शुक्रबार नेपाल चेम्बर अफ कमर्शले काठमाडौंमा आयोजना गरेको एक कार्यक्रममा मन्त्री यादवले यथार्थमा आधारित भएर सरकारको आलोचना गर्न प्रमुख प्रतिपक्ष दल कांग्रेसलाई सुझाव दिए । विषादी प्रकरणमा आफ्नो इज्जत नरहने गरि सरकारको आलोचना गरेको मन्त्री यादवको दावी छ ।

मन्त्री यादवले व्यापारीहरुलाई बस्तुको मूल्य जथाभावी नबढाउन आग्रह गरे । उनले उत्पादन वृद्धिमा जोड दिएर व्यापार गर्न पनि निजी क्षेत्रका व्यवसायीहरुको ध्यानाकर्षण गराए । सरकार निजी क्षेत्रसँग मिलेर अघि बढन तयार रहेको मन्त्री यादवले बताए ।