नयाँ दिल्ली– आगामी सेप्टेम्बरमा चन्द्रमामा अवतरण गर्ने लक्ष्य लिइएको चन्द्रयान–२ नामक भारतीय अन्तरिक्षयान सार्वजनिक गरिएको छ ।

भरतको अन्तरिक्षसम्बन्धी अनुसन्धान संगठन इस्रोले चन्द्रयान–२ नामक अभियानमा प्रयोग हुने अन्तरिक्षयान सार्वजनिक गरेको हो । चन्द्रयान आगामी शनिबार दक्षिणी भारतको आन्ध्र प्रदेश राज्यस्थित श्रीहरिकोटा अन्तरिक्षयान प्रक्षेपण केन्द्रबाट प्रक्षेपण हुने र आगामी सेप्टेम्बर ६ मा चन्द्रमामा पुग्ने लक्ष्य राखिएको छ ।

यो अभियान सफल भए भारत चन्द्रमामा सफलतापूर्वक अवतरण गर्ने चौथो मुलुक बन्नेछ । यसअघि रुस, अमेरिका र चीनले मात्रै चन्द्रमामा आफ्ना अभियानको सफल अवतरण गरेका थिए । हालै इजरायलले चन्द्र अभियानको अवतरण प्रयास असफल भएको थियो ।

अवतरित यानले यसअघि अनुसन्धान नगरिएको चन्द्रमाको दक्षिणी ध्रुवमा पुगेर अनुसन्धान गर्ने इस्रोले जनाएको छ । यसले चन्द्रमामा पृथ्वीको १४ दिन बिताउने जनाइएको छ ।

भारतले यसअघि सन् २००८ मा चन्द्रयान–१ नामक आफ्नो पहिलो चन्द्र अभियान प्रक्षेपण गरेको थियो । चन्द्रमाको परिक्रमा गरी अनुसन्धान गर्ने गरी प्रक्षेपण गरिएको उक्त अभियानसँग ग्राउण्ड स्टेशनको सम्पर्क ३ सय १२ दिन पछि टुटेको थियो ।