मेक्सिको– मेक्सिकोमा हत्या गरी गाडिएको अवस्थामा ३५ शव फेला परेको छ । मेक्सिकोको दोश्रो ठूलो शहर गुआडालाहारामा ३५ जनाको शव फेला परेको अधिकारीले जनाएका छन् ।

शहरको जापोपान क्षेत्रमा १० फिट गहिराईमा २७ जनाको शव फेला परेको र त्यहाँ उत्खनन गर्ने काम भइरहेको जनाइएको छ । त्यसबाहेक नजिकै रहेको चिहानमा अरु ७ शव फेला परेको र शहरकै अर्को स्थानमा एक शव फेला परेको अन्तर्राष्ट्रिय सञ्चारमाध्यमले जनाएका छन् ।
शवको पहिचान गर्न कठिन रहेको र यसबारे आवश्यक अनुसन्धान प्रक्रिया अघि बढाइएको अधिकारीले जनाएका छन् ।

यद्यपि मेक्सिकोमा लागू औषध ग्याङ्गहरु निकै सक्रिय छन् भने उनीहरुले निरन्तर संगठित अपराधमा संलग्न रहँदै आएका छन् । मेक्सिको विश्वको सबैभन्दा धेरै हत्या हुने मुलुकमध्ये पर्छ । अघिल्लो वर्षमात्र मेक्सिकोमा २९ हजार भन्दा धेरैको हत्या भएको थियो ।